“Көмүс күһүн бэлэҕэ” күһүҥҥү дьаарбаҥка

Лөгөй нэһилиэгэр балаҕан ыйын 18 күнүгэр, үгэс быһыытынан “Көмүс күһүн бэлэҕэ” диэн ааттаах күһүҥҥү дьаарбаҥка ыытылынна.

Бу дьаарбаҥканы Бүөтүр Оҕотоойоп аатынан сынньалаҥ киинэ уонна Надежда Егоровна Бурнашева салайааччылаах “Лөгөй оҕуруоччуттара” түмсүү сылын аайы тэрийэн ыытар.

Тэрээһин, олохтоох дьаһалта эҕэрдэтинэн, Виталий Гоголев, Уйгулаана Бочкарева ылбаҕай ырыаларынан уонна оскуола оҕолорун “Хомусчаана” бөлөх толорууларынан арылынна.  Атыы-тутуу дьаарбаҥкатыгар  кыттыыны ыллылар: “Лөгөй оҕуруоччуттара” уонна “Өбүгэ аһа” түмсүүлэр бастыҥ хаһаайкалара.

Дойдубут илгэтин, айылҕабыт уйгутун, дэлэй  өлгөм быйаҥын сомсон байылыат олоҕу түстүүр оҕуруот аһынан дьарыктанар, ону тэҥэ сибэкки арааһын, мас эгэлгэтин олордор “Лөгөй оҕуруоччуттара” түмсүү көҕүлээһининэн IV-с сылын ыытыллыбыт “Сад уонна оҕуруот” күрэх кыайыылаахтарын наҕараадалыыр түһүмэҕэ, “Саамай, саамай…” оҕуруот аһын күрэҕэ нэһилиэк олохтоохторун болҕомтолорун тарта.