Бииргэ буолуу түһүлгэтэ

Олунньу 21 күнүгэр П.П. Оготоев аатынан сынньалаҥ киинигэр истиҥ көрсүһүү буолан ааста. Кыттыыны ыллылар: “ Лөгөй нэһилиэгэ” сирин түөлбэтин баһылыга Н.Н. Попов, Владимир Заболоцкий — Саха Өрөспүүбүлүкэтин үтүөлээх уонна норуодунай артыыһа, Афанасий Мигалкин- историяны, кыраайы үөрэтээччи ХИФУ “Сурук-бичик” түмэлин салайааччыта, Александр Протодъяконов- “Айыы ситимэ” түмсүү салайааччыта, уһуйааччы (АГИКИ), “Суруйааччылар алаастарынан” уонна “Урбаанньыттар алаастарынан” суоллар ааптардара, Татьяна Жиркова — норуот үөрэҕин тарҕатааччы, культуролог.

Бу бииргэ буолуу түһүлгэтигэр историяны, кыраайы үөрэтии соруктарыгар уонна “Ийэ үөрэҕэ” сэһэн тула истиҥ сэһэргэһии буолла. Биир дойдулаахтарбыт Зоя Тумусова “Кэрэ дойдум Кэптэни”, Валентина Бурнашева “Сайда тур тапталлаах оскуолам!”, “Үйэ саас эйиэхэ өрөгөй, Тойон Лөгөй!” хоһоонноругар норуодунай артыыс  Владимир Заболоцкай айбыт ырыаларын толорон, өрө күүрүүлээхтик ыллаан Ийэ дойдуга бэриниилээх буолуу, төрөөбүт дойдубутунан киэн туттуу иэйиитин иҥэрдэ. Бэйэтин көрүүлэрин, санааларын дойдутун дьонугар тириэртэ.